fbpx
【氣溫驟降】一文睇晒:冬天BB甜睡貼士

【氣溫驟降】一文睇晒:冬天BB甜睡貼士

呢排天氣顯著轉涼,BB都瞓得唔係幾好,成日扎醒喊,令媽媽好困擾。既怕BB瞓覺時凍親,打噴嚏容易扎醒,但幫BB著厚衫又怕焗親唔舒服~因為BB調節體溫能力較弱,媽媽更需要格外留神!
大家都知道BB瞓得好=媽媽瞓得好,想BB舒服又溫暖咁一覺瞓天光,媽媽都可以好好休息?Biolane MaMa分享下自己經驗畀大家啦~

閱讀全文

• 好多爸媽過於擔心BB 凍親感冒,為BB穿上過多或過厚嘅保暖衣物,即使開住暖氣仍幫BB著羊毛/發熱內衣,包到成隻糉咁,無注意BB已經過熱。
• BB新陳代謝快,散熱能力又未發育成熟。BB瞓覺時穿着阻礙排汗嘅發熱衣,或者著得太多衫,除咗令BB瞓得唔安穩,仲會令BB成身汗,汗水對皮膚造成刺激,更會導致毛孔受阻塞而發炎,頸摺位、背脊等出現熱痱,又紅又痕。而且背部出汗後,反而會因為濕涼而凍親感冒
• 媽媽要定時Check下BB嘅身體會唔會太熱,可以摸摸BB背脊同頸背皮膚,如果頸後太涼就需要添衣;如果發覺有汗而且好熱,就表示著得太多衫喇,可以脫去羊毛/發熱內衣,避免BB出汗。注意因為BB血液循環不如大人,手指腳趾正常都會比身體其他部位凍,所以避免摸BB手或腳去評估。
• 冬天穿著衣物應以輕巧為主,太厚太焗身嘅質料都不宜。BB頭部能為身體散熱及調節體溫,所以瞓覺時唔好戴帽,或用任何衣物遮蓋頭部。
• BB瞓覺時鍾意周圍郁,好容易踢被著涼。媽媽可以同BB揀一啲純棉包腳款連體衫,保持腳仔溫暖。

• BB一歲之前由於散熱能力未完全發育,唔可以好似大人咁調節體溫,所以避免使用熱水袋、冚電熱毯、厚羽絨被,以免導致體溫過高造成不適或危險。
• 媽媽可選擇使用具保暖功能嘅嬰兒睡袋,既可以包裹住BB身體、腳仔保暖,同時防止BB郁動時令被子覆蓋頭頸,造成呼吸困難,無袖背心款仲可以比BB四肢自由活動自如。BB猶如在媽媽肚內面咁溫暖又有安全感,自然瞓得甜啦!

• BB體溫一般比大人高1至2度,如果房間溫度過高或太焗促,BB就好難入睡,將睡房溫度調節到18至22度就最理想。
• 確保房間空氣流通,如果要開暖氣,可以開少許窗透氣,避免暖氣抽乾空氣內水分,維持舒適室溫,有助BB瞓得安穩。
• 冬天常用暖爐保暖,卻會降低室內濕度,令BB皮膚表面水份流失更多而變乾燥,所以開暖爐時可以喺房間放杯水,或用放濕機保持空氣濕潤,並多啲畀BB飲溫水同搽保濕膏。
• 如果BB瞓覺位置靠近暖爐,亦會因太熱而使肌膚痕癢加劇,媽媽要特別注意放暖爐嘅位置喇~

• 因為沖涼後,人嘅體溫會稍微升高,如果想BB易入睡,就要等待體溫回復正常;而且剛沖涼後身體會有濕氣,入夜後,好易令BB凍親,所以建議盡量喺較為溫暖嘅午間,或瞓覺前2個鐘為BB洗白白。
• 天氣凍,都千祈唔好用過熱嘅水幫BB沖涼,水溫以37℃-38℃左右最好,因為如果BB皮膚接觸熱水愈耐,愈易流失自然油脂保護膜,令皮膚鎖水能力降低,就好容易出現乾燥痕癢問題,甚至引發濕疹。
• 冬天BB沖涼時間5-10分鐘已足夠,媽媽可選用無需過水、沖涼洗頭兩用嘅沐浴/洗髮啫喱,方便之餘又可縮短沖涼時間,避免BB凍親傷風感冒、皮膚變乾燥,尤其含有椰子油及葵花籽油成份,可增加皮膚鎖水功能,避免水份流失。 BB浸浴時,更可噴1-2下天然杏仁油於浴盆水,深層滋潤BB乾燥肌膚。

• 天氣乾燥,容易造成敏感、濕疹等皮膚問題,好多時搽完cream無幾耐,BB皮膚又開始紅同痕,令BB成日忟憎,瞓得唔好,咁就要增加搽保濕膏次數,keep住皮膚滋潤。
• 臨瞓前為BB 皮膚保濕,可用無香料、潤而不立嘅抗敏保濕膏混合杏仁油一齊搽,就可以深層滋潤肌膚。又可以搽比較滋潤嘅冷霜乳液,含蜂蠟、甜杏仁油成份,更有舒緩、修復嘅作用,咁就唔會痕到瞓唔到啦!
• BB扭計煩躁不安,瞓覺前媽媽可以試下用杏仁油按摩BB全身,有助舒緩情緒、令BB放鬆入睡,滋潤肌膚,減輕乾燥痕癢感,仲可以促進親子關係添!

show less

Facebook Comments