Biolane MaMa專訪:神隊友全職爸爸Jeff

Biolane MaMa專訪:神隊友全職爸爸Jeff

屋企有咗BB以後,好多新手媽媽都抱怨老公湊仔粗心大意、論論盡盡,更過份係翹起雙手愛理不理,令媽媽好崩潰!
不過,都有唔少神隊友好值得表揚架~
全職爸爸Jeff就係一位超級神隊友,太太在職工作,而佢自上年開始就選擇暫時唔返工,親力親為湊2個幼稚園小朋友。

閱讀全文

全職「湊仔公」之煉成
細心嘅Jeff,囝囝囡囡仲係BB嘅時候,已經自動自覺負責沖涼、換片、餵奶掃風、氹瞓覺,樣樣做得妥妥當當。Jeff:「因為太太坐月時餵人奶好攰,要抖多啲,所以我做到嘅都會做,分擔一下,唔使佢咁辛苦吖嘛!」做全職爸爸之前,Jeff 試過一邊半工讀一邊湊BB,有時帶埋BB返工,仲會喺office換片,呢段時間Jeff覺得好開心,但都好忙,有時兼顧得幾吃力。
而佢同太太就計劃想其中一方全職全力湊小朋友:「我好鍾意小朋友,BB轉眼間長大,所以我希望喺佢哋0至3歲呢段好重要嘅階段,由爸爸或媽媽全職照顧佢哋,而唔係靠晒工人。剛好上年我有個機會可以暫時停工,就由我開始全職爸爸嘅生涯喇!」

樂於陪玩陪學習
兩個可愛小BB,依家已經讀K1同K2喇,Jeff亦做咗一年嘅全職爸爸,:「呢一年都主要由我負責照顧小朋友,帶佢哋返學放學、去公園玩、練習中英文、跟功課通告、安排課外活動…陪玩陪讀書陪學嘢,就好似佢哋嘅小老師咁!工人放假,我就幫手打理家務。」每日抱著囝囝囡囡接放學、去公園玩,都係最美好嘅時光。

Jeff啱啱仲陪囝囝囡囡過咗一個好開心嘅暑假,去上體操班、去濕地公園、學攀石、去游水、睇圖書….令好多媽媽崩潰嘅暑假,對Jeff 嚟講,可以日日陪住囝囝囡囡,卻係好幸福嘅事:「媽媽全職湊BB好正常,但爸爸唔返工湊B,更有唔少心理同實際挑戰要克服,都會有迷惘嘅時候,但可以好似媽媽咁同小朋友咁親近,同佢哋一齊經歷成長、人際關係、面試等一個個關口,仲有好多sweet嘅moments,都係全職爸爸嘅幸福。本來我唔擅長湊BB,而有太太支持同協助,又係另一種福氣呢!」
相比起BB時半夜要起身餵奶換片原來都係「小兒科」,依家兩個小朋友慢慢長大,加上年紀相近,兩兄妹會爭寵、想獨佔爸爸,而且會鬧情緒唔講道理,會教養問題令Jeff最頭痛:「佢哋咩都爭一餐,但轉頭糖黐豆,始終小朋友禮貌、兄妹相處呢啲行為問題,屋企工人唔會教到,所以我希望花多啲時間同佢哋相處溝通,令佢哋學識控制情緒、相親相愛啦~」

四歲嘅約昭、三歲嘅萃愛活潑好動,Jeff 好花心思安排活動,同去好地方玩,令佢哋有個開心童年。

點為之「神隊友」?
Jeff話最緊要係有責任感,照顧小朋友嘅情感需要,好似佢平時會留意有咩圖書、教材啱小朋友,去旅行都會諗咗有咩啱小朋友玩先。囝囝學鋼琴,佢都一齊學 ,並且揀咗同囝囝嘅老師學,只希望同囝囝一齊去經歷、去突破。
咁湊仔過程中,同太太之間會有爭拗嗎?Jeff直言:「男同女睇嘢角度可以好唔同,所以難免有衝突,不過我太太係心理學家,會用有效嘅方法處理教養小朋友嘅問題,呢方面可以同我互補。而且老實講,無論邊個湊仔,在職定全職,都會有好攰、好頂唔順嘅時候,期望對方出手幫忙,畀自己抖下,所以一定要互相分擔。媽媽每晚都會一陪二瞓覺,畀我可以休息下,小朋友扮靚、安排膳食、搵衣服玩具,都全靠太太,並且佢仲要返工賺錢,所以媽媽都係我嘅神隊友呢!」
Jeff話要化解雙方埋怨衝突,除咗多啲溝通,媽媽可能都要體諒一下男人嘅限制,老公好多時未必好明白太太嘅感受,呢個時候媽媽可以嘗試描述多啲同表達,同埋一定要出聲搵幫手,千祈唔好死頂呀!

Biolane Ma Ma 就覺得湊仔,爸爸都做得到!當然都要靠媽媽嘅大力支持同協助,因為每個人有唔同嘅才能、付出,爸爸媽媽之間互相欣賞、體諒互補好重要架!

show less

Facebook Comments