🍼一文睇晒:返工餵母乳攻略

🍼一文睇晒:返工餵母乳攻略

終於放完產假要返工喇!除咗同BB難捨難離,新手媽媽另一個挑戰就係:返工餵母乳!
除咗靠自己嘅堅持同努力,仲要周詳計劃同工具協助,以下一套返工餵母乳攻略,母乳working mum必讀 !

閱讀全文

• 復工前要同上司、人事部溝通,說明自己嘅餵母乳意願同需要嘅支援,希望公司可以體諒同支持。
• 表明每日約需要2次、每次30分鐘喺公司泵奶(其中一次可以係Lunch時間)。*
• 詢問人事部可唔可以安排合適嘅泵奶房間(如會議室、休息室等)。

*餵奶及泵奶時間表(只作參考,媽媽可按需要調節):

返工前 (約7am- 8am) 埋身親餵BB
中午 (約12nn – 2 pm) 第一次泵奶,約需30分鐘
下午 (約4pm- 6 pm) 第二次泵奶,約需30分鐘
放工後 按BB需要埋身親餵

(資料來源:《香港母乳育嬰協會》)


• 復工前兩星期,可先認識泵奶器嘅運作,練習泵奶;習慣穩定餵哺/泵奶規律,令身體習慣按時泵奶,同令BB適應埋身餵哺以外嘅飲奶模式。
• 返工前開始「儲奶」,每次餵奶後可將剩餘嘅奶泵出嚟,以奶袋儲好,放喺冰格。
• 儲冰奶係以防返工後奶量唔穩,有預備足夠奶量,BB就唔怕會「斷糧」啦!
• 不過要注意母乳嘅成份,係會隨住BB生長而調節嘅,而新鮮母乳最能配合BB唔同階段嘅需要,所以唔建議儲備太多母乳。


1. 手動/自動泵奶器,應檢查喇叭大小、擺放喇叭位置同負壓力度係咪適中。(媽媽唔一定需要購買泵奶器,建議可先學習用手擠奶)
2. 儲奶袋 / 奶樽(每日需用至少2個,用作儲存泵出嚟嘅母乳)
3. 冰袋連冰種1個(於運送途中保冷)
4. 奶瓶餐具抗菌清潔液
5. 密封膠盒(洗奶樽用)
6. 密實袋2個(用以裝洗淨嘅奶泵、奶樽等)


• 將泵好嘅母乳倒入奶瓶 / 奶袋後,應寫上日期、時間同奶量,以方便每次餵奶時取出日期最早嘅存貨。若打算第二日使用,可儲放喺冷藏格;如稍後先用,可直接儲於冰格做冰奶 。

母乳儲存溫度同時間:

存放溫度 儲存時間
室溫(25-37℃) 4小時
冰袋加冰種(15℃以下) 24小時
雪櫃冷藏格(2-4℃) 5天
雪櫃冰格(-18℃或以下) 3個月
獨立冷藏櫃(-20℃) 6個月

(資料來源:衞生署《愛• 從母乳開始》)

• 母乳應避免與其他食品接觸,若要儲於雪櫃冷藏格/冰格,奶袋宜密封並存放於膠盒中。
• 要確保上下班運送時間內母乳保持低溫,冰袋內需備有足夠雪種,以免影響母乳質素。返屋企第一時間將雪奶/冰奶放返喺雪櫃。
• 從雪櫃內取出嘅儲奶,需放喺暖水內解凍,絕對唔可以放喺微波爐內加熱。


• BB 吸吮往往最能夠暢通乳管,幫助造奶,所以喺屋企嘅時候,或周末放假,盡量直接埋身餵哺BB,也可一邊餵哺一邊擠奶。
• 兩次泵奶盡量相隔唔好超過4 – 5 小時,以保持穩定奶量。
• 泵奶過程宜放鬆心情,唔好擔憂自己乳汁唔足夠。
• 每日多飲暖水同清淡湯水,預防乳汁過於濃稠,如果無咁多時間煲湯,可以飲上奶炒米茶方便上奶。
• 餵夜奶雖然係好辛苦,但因為媽媽夜晚嘅造奶荷爾蒙較多,所以餵夜奶有助增加奶量,若BB真係唔再食夜奶,可以喺睡前擠奶一次。


• 每次哺乳時,盡量畀BB吸至乳汁通暢,若有唔暢通感覺,就要用吸奶器同按摩將滯留嘅乳汁盡量擠出,以避免乳房腫脹,增加乳管閉塞嘅風險。
• 如感到疼痛,可試試喺餵哺母乳前,先以溫熱毛巾暖敷乳房,加以按摩,畀母乳較容易流出,同時舒緩腫痛。
• 注意唔好冷敷乳暈乳頭,因咁反而會抑制乳汁排出呢!
• 選用天然羊毛脂成份嘅母乳專用乳頭護理霜,每次餵哺後或有需要時,擠出少量於食指及中指,再輕輕塗抹於乳頭,有助保護及修護受損乳頭組織。

全母乳餵哺之路好辛苦,尤其係要返工泵奶嘅working mum,更有好多限制,有啲媽媽返咗工之後真係未必可以定時定候泵奶,加上工作壓力,怕奶量會跌,搞到BB唔夠飽!
但媽媽唔需要過度自責、承受太大壓力,其實若擠出嘅母乳不敷應用,都可以混合配方奶粉餵哺BB,最緊要係用一個自己最舒服最Relax 嘅方法餵奶,同埋同BB多啲親密嘅相處時光呀~

想了解更多有關母乳餵哺嘅資料,可參考以下網頁:

衞生署家庭健康服務
• 愛嬰醫院香港協會
• 香港母乳育嬰協會
• 香港國際母乳會

show less

Facebook Comments