Biolane MaMa專訪:陪月姨姨毛太

Biolane MaMa專訪:陪月姨姨毛太

好多新手媽媽對住初生 BB 束手無策、手忙腳亂,如果有一位熱心嘅陪月姨姨嘅幫忙,真係可以易啲渡過難關!

閱讀全文

Biolane MaMa認識熱心嘅陪月姨姨毛太,係透過佢嘅Facebook專頁,上面post滿中西日韓式料理、麵包甜品燉湯,全部都出自毛太嘅巧手,亦有唔少媽媽Fans留言講笑話毛太嘅美食太邪惡,害佢哋要努力減肥。

廚藝了得嘅毛太,已經做咗4年陪月員,佢自己都係媽媽,平時最鍾意煮嘢食,仲鍾意分享一啲簡單食譜、湊BB經驗心得、陪月趣事到Facebook同媽媽互動。

毛太幫坐月媽媽手照顧BB,好似換片、沖涼、餵BB飲奶等等,令媽媽可以休息,減輕負擔之外,更會教媽媽正確餵奶、幫BB掃風呢啲知識。毛太話有啲新手媽媽覺得自己好多嘢唔識,加上長期唔夠瞓,會成日喊、發脾氣,好無助,所以希望教識佢哋湊BB,陪佢哋行呢段最需要人幫忙嘅路,眼見坐月媽媽由騰雞變淡定,真係好有成功感!

毛太廚藝了得,仲會上堂學整麵包,畀媽媽食新鮮無添加防腐劑嘅早餐,同會用坐月媽媽鍾意嘅食材,花心思煮唔同嘅菜式、湯水,就算係煮雞都可以有18種口味,日日早午晚餐下午茶款式都唔同,坐月餐都可以好精彩:「我希望情緒低落嘅媽媽坐月時,感受到美食嘅幸福,唔會無啖好食,心情好啲,就會健康啲。不過甜品含有蛋、奶、糖,好多坐月媽媽唔食得,我整嘅朱古力麵包,係用嚟氹小朋友,等佢哋乖乖哋,令媽媽可以好好休息。」

毛太希望學整多啲唔同口味嘅包包畀坐月媽媽,食得開心,仲食得健康。(相片來源: 資深陪月員毛太 Facebook )

湯水、食療對坐月媽媽相當重要,毛太仲會請教相熟嘅中醫師,留意媽媽體質、餵母乳情況,煮補身菜式燉湯,幫媽媽身體復元。毛太話至怕媽媽咩都唔食,因為有Working Mom為咗準備返工節食減肥,但咁樣其實會令身體虛弱,影響母乳餵哺,所以毛太都建議坐月期間唔好減肥住,如果急於修身,餵母乳就係最有效嘅方法!

「坐月媽媽產後壓力大, 好需要有人幫忙,我最想分享湊BB經驗,幫到佢哋之餘,仲畀啲正能量佢哋!」坐月媽媽有時會唔開心,諗嘢好負面,或者兩公婆因為湊BB有爭執,毛太都會同佢哋傾下計,開解同關心佢哋,希望幫到解決問題,對雙方同BB都好。

Biolane MaMa 好欣賞毛太嘅細心同熱心,陪伴產後媽媽經歷人生嘅一個大轉變,有佢嘅鼓勵, 媽媽往後都可以輕鬆自在,培育出Happy baby啦!

show less

Facebook Comments