Working Mom專訪-我最鍾意DIY可愛頭飾同BB扮靚靚 !

Working Mom專訪-我最鍾意DIY可愛頭飾同BB扮靚靚 !

從事設計工作嘅媽媽 Rush Mom Nat ,同好多Working Mom一樣,每日早出晚歸, 雖然工作好忙,但都盡量想爭取時間陪伴玥玥BB。

閱讀全文

玥玥依家 9個月大,成日笑得好甜好可愛,Rush Mom Nat話自己一放工就即刻飛奔返屋企,攬住玥玥:「工作會令我擁有屬於自己嘅時間,但返工時我都會好掛住玥玥,同會因為錯過見證好多BB 嘅第一次而覺得可惜,好似佢第一次識喺坐廁去便便,都係我媽媽影相畀我先知。仲有我餵母乳,但只能喺公司泵奶,少咗餵哺BB嘅親密接觸。」

時間有限,而BB長大得好快,令Rush Mom Nat更格外珍惜同玥玥每分每秒嘅相處時光:「每次玥玥攬住我錫,同埋一齊照鏡笑,我都覺得好sweet好開心。」

同BB扮靚靚亦係Rush Mom Nat最珍惜嘅親子時光,因為玥玥依家少頭髮,Rush Mom Nat想幫佢扮靚靚,所以尋覓好多唔同款式嘅頭飾、頭帶,仲會設計獨一無二嘅精緻頭飾畀玥玥戴: 「我會喺日本買花布,同埋我公司喺荔枝角,我會趁lunch時間趕去深水埗『布街』搜購薄紗、絲帶同各種配件,夜晚玥玥瞓著之後就開始去整頭飾,由畫草圖、剪裁布料到縫配件,整1個頭飾要花上2個鐘去完成,都幾花心機架!但每次出街玥玥頭上都戴住媽媽一針一線自製嘅頭飾,配上唔同嘅衫仔,真係好可愛,仲有好多人話好靚,問我邊到買、點樣整,令我好有滿足感!」

 呢啲就係Rush Mom Nat為玥玥設計嘅可愛BB頭飾。

其實Rush Mom Nat以前都試過幫人設計飾物,不過因為之前工作忙,就將呢個興趣放低咗,依家因為有玥玥呢個可愛model乖乖戴住,所以就算捱眼瞓都努力去整。Rush Mom Nat仲話希望將來可以開網店賣BB頭飾,鍾意嘅媽媽都可以作為送畀BB嘅小禮物。

一個小小嘅手作頭飾,可以體會到一個忙碌媽媽對囡囡嘅心思同愛意,真係好值得欣賞呀!

show less

Facebook Comments